Nekazaritzako Lurzatien Informazio Geografikoko Sistema (SIGPAC) Nekazaritza, Arrantza eta Elikadura Ministerioaren aplikazio bat da, eta aukera ematen du nekazariek eta abeltzainek Espainiako lurralde osoan lantzen edo aprobetxatzen duten azalerarekin lotutako edozein laguntza-erregimenetan aitortutako lursailak geografikoki identifikatzeko.

SIGPACen jasotako informazioa publikoa da, eta Erkidegoko laguntzen onuradun izan daitezkeen lurzatiei buruzko informazioa jasotzen du. Partzelen eta esparruen eta horien erabilera edo aprobetxamenduen euskarri grafikoa du.

Hori eguneratzeko, Landa Garapeneko eta Ingurumeneko Departamentuak urtero koordinatzen ditu katastroarekin aurreko urtean aldatu diren Nafarroako Lurralde Aberastasunaren Erregistro Fiskaleko katastro-partzelen identifikazioa, morfologia eta ustiapen-sistema (lehorrekoa/ureztatua).

Horrez gain, NELIGSko informazioa eguneratuko du, eskuragarri dagoen beste edozein informazio erabiliz, hala nola, Mahastien Erregistrokoa, tokian berean egiten diren kontrolak, ortoargazkiak, sateliteko irudiak, erabileren mapak eta aprobetxamenduak. Nabarmentzekoa da 3 urtean behin ortoargazkiak berritzen direla, eta azken 5 kanpainetan aitortutako esparru guztiak berrikusten direla.

Hala ere, SIGPAC esparruak deklaratzen dituen nekazaria da erregistratutako informazio grafikoa eta alfanumerikoa egiazkoa izatearen eta errealitatearekin bat etortzearen azken erantzulea. Bereziki, eskatzaileak egiaztatu behar du mugatze grafikoak eta NELIGS esparruaren erabilerak bat egiten dutela lursailaren errealitatearekin eta esparruak ez dituela aukeratu ezin diren elementuak (hala nola, bideak, eraikinak eta izaera iraunkorreko beste elementu elkor batzuk). Larre-esparruen kasuan, egiaztatu behar da esparruari esleitu zaion dirulaguntza-koefizienteak behar bezala islatzen duela diruz lagundu daitekeen azaleraren ehunekoa. Ados ez badago, SIGPACa aldatzeko eskaera egin beharko du.

Aldaketarako eskaera esparru horrek duen katastroko lurzatiaren informazio grafikoari edo alfazenbakizkoari buruzkoa denean (katastroko mugak eta ustiapen sistema -lehorrekoa/ureztaketakoa), eskaera hori Lur-ondasunen Erregistroan edo Udalean aurkeztu beharko da. Nabarmentzekoa da hiriguneetan katastroko hainbat lurzati biltzen dituzten SIGPAC lurzatiak definitzen ahalko direla.

Laguntza bat eskatu edo ordaindu ondoren, eguneraketa horiek agerian jartzen badute SIGPACen erregistratutako informazioa ez dela zuzena, dagokion arau-hauste eta zehapen araubidea aplikatuko da, eta hala behar denean, bidegabeki jasotako ordainketen itzulketa.  Eskatzailea salbuetsita geratuko da, baldin eta modu frogagarrian frogatzen badu agintari eskudunari jakinarazi diola, ezarritako epeetan, egiaztatutako desadostasuna.

Bi epe ezartzen dira eskaerak aurkezteko.

• 1. epea: Bat dator laguntzen eskaera bakarra aurkezteko epearekin, aldaketak aurkezteko epea barne. Epe horretan aurkeztutako eskaerek ondorioa izanen dute urte horretan zehar aurkeztutako laguntzak emateko.
•  2. epea: Irailaren 1etik urriaren 31ra. Epe horretan aurkezten diren eskaerek ondorioa izanen dute hurrengo urteko laguntzak emateko.

Sistemaren sailkapen espezifikoa, lursail bati eman ohi zaion erabilera edo aprobetxamendu mota identifikatzeko balio duena. Honako hauek dira egungo erabilerak SIGPACen

NEKAZARITZAKO ERABILERAK:

Lur goldagarria (TA): laboreak ekoizteko erabiltzen diren lurrak edo laboreak ekoizteko eskuragarri daudenak, landatu gabekoak baitira. Belarrak edo bestelako bazka-laboreak (ereinak) landatzeko erabiltzen badira, horiek ustiategiko laboreen edo luberrituen txandaketan sartu beharko dira bost urtetik beherako epean. Gainera, erabilera hau izaten ahalko dute txandaketa laburreko baso landaketen esparruek, besteak beste:  Eucalyptus (eukaliptoa), Paulownia, Populus sp (makala), Salix sp (sahatsak eta zumeak) eta Robinia pseudoacacia L, gutxieneko plantazio dentsitatea eta plantazio zikloaren gehieneko iraupena betetzen badute. Landare aromatiko zurkarak eta zainzuri plantazioak dituzten esparruak ere kategoria honetan sartzen dira. 

Baratzea (TH): barazkiak, berdurak eta lekaleak eta, batzuetan, nahastutako fruta-arbolak hazteko erabiltzen den lursail zatia.

Berotegiak eta plastikopeko laboreak (IV): beirazko edo plastikozko eraikuntzen bidez babestutako edo plastikoz estalitako laboreetarako erabilitako lursail zatia, landareei kanpoan baino tenperatura handiagoa ematen diena. 

Olibadia (OV): oliba ekoizteko olibondo plantazio bat duen lursail zatia.

Zitrikoak (CI): fruta ekoizteko zitrikoen plantazio bat duen lursail zatia.
 
Fruitu lehorrak (FS): oskoldun fruta-arbolak (almendrondoak, hurritzak, intxaurrondoa, pistatxoa edo beste batzuk) eta algarroboak dituen lursail zatia, fruitu lehorrak eta algarroboak ekoizteko.

Fruta-arbolak (FY): aurreko kategorietakoren batean katalogatu ezin diren fruta-arbolen plantazioren bat duten lursail zatiak. Gainera, erabilera horren barruan sartuko dira berariaz boilurra ekoizten duten plantazio zurkarak.
Oharra: Naturalki boilurra ekoizten duten eta berariaz labore praktikarik aplikatzen ez duten baso azalerak ezin dira onartu oinarrizko ordainketa araubiderako eta FO erabilera izan behar dute.

Mahastia (VI): Mahastien plantazioak dituen lursail zatia, mahatsa edo/eta propagazioko material begetala ekoizteko (adar aldaxkak edo ernamuinak).

Mahasti elkarketak: SIGPACen, fruta-arbolak dituzten mahasti elkarketa desberdinak bereizten dira. Elkarketa esaten zaie mahasti eta zuhaitzen plantazioa duten eta bi erabilerak labore bakarreko azaleratan banatu ezin dituzten lursail zatiei. Mahastiari lotutako espezie motaren arabera, SIGPACen honako elkarketa hauek sartu daitezke:
- (CV) Zitrikoak-Mahastia
- (FV) Fruitu lehorrak eta mahastia
- (VF) Mahastia - Fruta-arbolak 
- (VO) Mahastia-Olibadia

Zuhaitz espezieen arteko elkarketak: SIGPACen, zuhaitz espezie ezberdinen arteko elkarketa desberdinak bereizten dira. Elkarketa esaten zaie espezie nahasketa duten eta bi erabilerak labore bakarreko azaleratan banatu ezin dituzten lursail zatiei. Lotutako espezie motaren arabera, SIGPACen honako elkarketa hauek sartu daitezke:
- (CF) Zitrikoak-Fruta-arbolak
- (CS) Zitrikoak-Fruta oskoldunak
- (FF) Fruta-arbolak-Fruta oskoldunak
- (FL) Fruitu lehorrak eta olibadia 
- (OC) Olibadia-Zitrikoak
- (OF) Olibadia - Fruta-arbolak

Larrea (PS): Belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, horren barruan sartuta bazkaleku iraunkorrak, baldin eta ustiategiko laboreen txandaketan bost urtez edo gehiagoz sartu ez badira, eta bost urtez edo gehiagoz luberritu, jorratu edo berriz erein ez badira bestelako gramineo edo belarkiekin.

Larre zuhaixkaduna (PR): Belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, horren barruan sartuta bazkaleku iraunkorrak, baldin eta ustiategiko laboreen txandaketan bost urtez edo gehiagoz sartu ez badira, eta bost urtez edo gehiagoz luberritu, jorratu edo berriz erein ez badira bestelako gramineo edo belarkiekin, larre moduan erabil daitezkeen beste zuhaixka espezie batzuk egonda.

Larre zuhaiztuna (PA): Belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, horren barruan sartuta bazkaleku iraunkorrak, baldin eta ustiategiko laboreen txandaketan bost urtez edo gehiagoz sartu ez badira, eta bost urtez edo gehiagoz luberritu, jorratu edo berriz erein ez badira bestelako gramineo edo belarkiekin, bazkarako erabil daitezkeen beste zuhaitz espezie batzuk egonda.
 
 

NEKAZARITZAKOAK EZ DIREN ERABILERAK:

Basogintza (FO): zuhaitz trinkoek edo baso produktuak lortzeko plantaziotik datozenek naturalki okupatutako lursail zatia, edo basoko teknika egokien bidez birpopulatu dena. Azken bi kasuetan, baso erabilera dela ulertzen da, zuhaitzaren egoera eta tamaina edozein izanda ere.

Bideak (CA): bideak. Bideak dira bideen pareko erabilera duten katastro lurzatiak ere, beren aprobetxamendua gorabehera.

Eraikinak (ED): nabe industrialak, abeltzaintza nabeak, etxeak, txabolak eta abar. 

Hiri-ingurua (ZU): etxebizitza multzo bat eta azpiegiturak edo nekazaritzarako ez diren bestelako espazioak biltzen dituen lursail zatia. Gainera, erabilera hori ematen zaie hiri-inguruko katastro erabilera parekideak dituzten lurzatiekin bat egiten duten lursailei.

Elkorrak (IM): bere ezaugarri fisikoen ondorioz nekazaritza ekoizpenik ematen ez duen lursail zatia (harkaitzak, harrobiak, legar hobiak, gatzagak, dunak eta abar). Halaber, erabilera hau ematen zaie larrearen antzeko estaldura duten esparruei, baldin eta horien erabilera nagusia ez bada nekazaritzakoa; besteak beste, aisialdi parkeak, kirol instalazioak, golf zelaiak, hiriko parkeak eta abar.

Ur-lasterrak eta urguneak (AG): jatorri natural edo artifizialeko erreka, errekasto, ubide, euri-bide, laku, urtegi eta abarrek okupatutako lursail zatia, esparrua aztertzen den unean ura dagoen ala ez gorabehera. Ur-laster eta urgunetzat jotzen dira uraren pareko erabilera duten katastro lurzatiak, beren aprobetxamendua gorabehera.
 

 BESTE BATZUK

Ortoargazkian sartu gabeko gune berrantolatua (ZC): erabilera hau ematen da, partzela kontzentrazio bat dagoenean eta jabetzaren banaketa berria ez denean eskura dagoen ortoargazki berrienean agertzen. Ondorioz, egiten diren bisitetan ez da erabilera hori esleitu behar.

Eremu zentsuratua (ZV): SIGPACek erabilera hau jasotzen du ortoargazkian “informaziorik ez duten” lurraldeko guneak identifikatzeko; nagusiki, instalazio militarrak izaten dira.

Paisaiako elementuen geruza: 1049/2022 Dekretuaren arabera paisaiako elementutzat jotzen denari buruzko informazio grafikoa jasotzen duen kartografia.

Arroz tradizionalaren geruza: Arroza tradizionalki hazteko azaleren informazio grafikoa jasotzen duen kartografia, erreferentziazko kanpainetan aitortutakoa, zeinak ekoizpen jasangarriarekin lotutako laguntza jaso ahalko baitu 2023tik aurrera (1048/2022 Errege Dekretua).

Desabantailan dagoen olibadiaren geruza: Zailtasun bereziak eta ingurumen balio altua duten olibadi azaleren informazio grafikoa jasotzen duen kartografia; olibadi horiek labore horrekin lotutako laguntza jaso ahalko dute, 2023tik aurrera. (1048/2022 Errege Dekretua).

Olibadi zaharraren geruza: Nekazaritzako sistema mediterraneo jasangarrien laguntzetarako egokiak diren olibadi azaleren informazio grafikoa jasotzen duen kartografia.

Zapalden geruza: Beren azaleraren zati handi batean terrazak edukitzeagatik identifikatutako esparruei buruzko informazio grafikoa jasotzen duen kartografia; esparru horiek karbonoaren nekazaritza ekoerregimenera atxiki ahalko dira: landare estalkiak eta estalki bizigabeak laborantza zurkarako lurretan, malda handiko lurretan eta zapaldetan, 2023tik aurrera. (1048/2022 Errege Dekretua).

Ubideen babes zerrenden geruza: Ubideen, urtegien, lakuen eta aintziren babes zerrendei buruzko informazio grafikoa jasotzen duen kartografia. Bere helburu nagusia nekazariei laguntzea da, onargarritasunaren Nekazaritza eta Ingurumeneko Baldintza Onak betetzeko (1049/2022 Errege Dekretua).

Errepikatutako laboreen geruza: Aurreko hiru kanpainetan labore beraren labore aitortutako lerro grafikoen geometriak probintzia eta udalerri mailan batzean sortutako geruza. Arroza eta urte anitzeko laboreak hemendik kanpo gaude. 

Hezegune eta zohikaztegien geruza: Hezegune eta zohikaztegien informazio grafikoa jasotzen duen kartografia. Bere helburu nagusia nekazariei laguntzea da, onargarritasunaren Nekazaritza eta Ingurumeneko Baldintza Onak betetzeko (1049/2022 Errege Dekretua).
 

 Nafarroako SIGPACeko informazioa hemen kontsulta dezakezu:

•    Nafarroako Gobernuaren webgunea. 
•    Nekazaritza, Arrantza eta Elikadura Ministerioaren webgunea