Nafarroako landetxetan ostatu hartutako atzerritarren kopuruak % 60 igo da azken urtean; era horretako establezimenduetan izan diren 102.392 turisten artetik, 13.310, hain zuzen. Aipatu beharra dago landako azpisektore horrek Foru Komunitatean ostatu hartzen duten bidaiari guztien % 9,4 hartzen duela.

2012an landetxetan 311.946 aldiz eman zuten gaua turistek –hiru bat gau batez beste–, eta haietatik 29.663 atzerritarrak izan ziren. Espainiako autonomia erkidegoen artean, Nafarroa bosgarren postuan dago landetxetan gaua emandako kopuruari dagokionez, IV. `Reyno de Navarra´ Landa Turismoko Nazioarteko Kongresuaren  barnean gaur emandako datuen arabera. Europa hegoaldean antolatzen den landa-turismoko lehiakortasunaren ekitaldi garrantzitsuena da eta Baluarte Batzar Jauregia eta Nafarroako Auditoriumean inauguratu da bigarren lehendakariorde eta Kultura, Turismo eta Erakundeekiko Harremanetarako Juan Luis Sánchez de Muniáin bertan zela.

Sánchez de Muniáin kontseilariak –Nafarroako Landa Turismoaren Federazioko lehendakari María Ángeles Ezquer eta Kongresuko zuzendari Luis Cortés-ekin batera– inaugurazioan azpimarratu du turismoa Nafarroaren produktu garrantzitsuenetako bat dela (bertako BPGaren % 6, 29.000ko biztanleria aktiboarekin eta 668 milioi euro baino gehiagoko diru-sarrerak sortuz), "azken urteotan hazkunde esponentziala" izan duen "sektore bizia" dela eragile pribatu eta publikoek elkarrekin batera egindako lanari esker eta bisitaria erakusten zaion adeitasunari esker, azaldu du. Nolanahi ere, azpimarratu du sektorearen finkatzea eta garapenak "produktuetan eta haiek kudeatzeko eran berrikuntza egitea" eskatzen duela.

Sánchez de Muniáinen nahia da IV. Kongresu honek sektoreari honako arlo hauetan aurrera egiten lagun diezaiola: profesionalizatzea, kalitatea, merkaturatzea, berrikuntza eta turismo-dinamizazioa, eta eragile guztien arteko integrazioa indartu dezala, bai eta sektore publiko nahiz pribatuaren arteko sintonia ere.