Nafarroako Gobernua mahastizaintza eta ardogintzako sektorearekin akordio batera iritsi da Foru Komunitateko ardogintzaren eta enologiaren jarduerak berrantolatzeko.

Akordio hori Nafarroako Zentroen Sare Teknologikoaren berrantolaketa-esparruan erdietsi da, eta haren helburua lehendik badiren zentro teknologikoak lehiakorrago bihurtzea da eta haien lana ordenatu eta koordinatzea. Xede horretarako, Nafarroan dauden hamalau zentro teknologikoetatik hamahiru sektoreko lau arlo handitan bildu dira, haietako bat, nekazaritzako elikagaiei buruzkoa.

Ardoaren eta enologiaren jarduerak berrantolatuz Nafarroako mahastizain eta upeltegiei egun eskaintzen zaien zerbitzua hobetzea bilatu nahi izan da. Horretarako, egokitzat jo da sektoreari laguntzeko neurriak politika orokorragoen esparruan sartzea eta unitateetan azpiegitura, ezagutza nahiz baliabide zabalagoak izateko aukerarekin. Nafarroako Mahastizaintza eta Enologia Estazioak (EVENA) zituenak baino zabalagoak.

Nafarroako Gobernuaren aldetik, lan-taldearen buru Landa Garapen, Ingurumen eta Toki Administrazioko kontseilari José Javier Esparza izan da, eta lan-talde hori honako hauek osatu dute: Nekazaritza eta Abeltzaintzako zuzendari nagusi Ignacio Guembe-k; Landa Garapeneko zuzendari nagusi Juan Pablo Rebolé-k, eta Energia eta Berrikuntzako zuzendari nagusi Iñaki Morcillo-k. Aldiz, ardo-sektorea Nafarroako Upeltegien Elkarteak eta Nafarroako Nekazaritzako Kooperatiben Batasunak (UCAN) ordezkatu dute.

Nafarroako ardogintzaren eta enologiaren jarduerak antolatzeko sistema berria ondorengo funtsezko premisan oinarritzen da: mahastizaintza eta ardogintzako esperimentazio, aholkularitza eta ikerketako jarduerak guzti baten moduan mantentzea, era horretan sektoreko eskari nagusiari erantzunez. Halaber, EVENA marka erabiltzen jarraitzea barnean hartzen du urte hauetan guztietan lortutako ospe eta entzutea ez galtzeko helburuarekin.

Erdietsitako akordioaren barnean laborategi enologikoa Landa Garapen, Ingurumen eta Toki Administrazioko Departamentuko laborategien unitate zentralizatuan sartuko da. Gainera, mahastizaintza eta ardogintzako produktuen nahiz edari bizien azterketen tasak eguneratuko dira, merkatuko prezioa adieraz dezaten.

Nafarroako Gobernuaren upeltegi instituzionalaren jarduerari dagokionez, oinarrian izaera esperimentala duena, Landa Garapen, Ingurumen eta Toki Administrazioko Departamentuari zuzenean lotuta jarraituko du.