navarra.es
Castellano | Euskara | Français | English
Ezagutzera eman
573/2007 Ebazpena, azaroaren 12koa, Lehendakaritza zuzendari nagusiak emana, Mendekotasun egoeran dauden pertsonen autonomia sustatzeko eta laguntza emateko abenduaren 14ko 39/2006 Legeari buruzko Estatuko Administrazio Orokorraren ...
573/2007 EBAZPENA, AZAROAREN 12KOA, LEHENDAKARITZA ZUZENDARI NAGUSIAK EMANA, MENDEKOTASUN EGOERAN DAUDEN PERTSONEN AUTONOMIA SUSTATZEKO ETA LAGUNTZA EMATEKO ABENDUAREN 14KO 39/2006 LEGEARI BURUZKO ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEAK 2007KO AZAROAREN 7AN HARTURIKO ERABAKIA NAFARROAKO ALDIZKARI OFIZIALEAN ARGITARATZEA XEDATZEN DUENA.
(2007ko 142. NAOn argitaratua, azaroaren 14an)
Lankidetza Batzordeak 2007ko azaroaren 7an harturiko Erabakiaren 4. atalean espresuki hala xedatzen delako, orok jakin dezan, ebatzi dut:Estatuko Administrazio Orokorraren eta Nafarroako Foru Komunitatearen arteko Lankidetza Batzordeak 2007ko azaroaren 7an harturiko Erabakia, ebazpen honen eranskin gisa ageri dena, Nafarroako Aldizkari Ofizialean argitaratzea.
ERANSKINA
Estatuko Administrazio Orokorraren eta Nafarroako Foru Komunitatearen arteko Lankidetza Batzordeak, mendekotasun egoeren arloan lankidetzari eta elkarlanari eusteko, Mendekotasun egoeran dauden pertsonen autonomia sustatzeko eta laguntza emateko abenduaren 14ko 39/2006 Legearen inguruan sortu diren liskarrei buruz, erabaki hau hartu du:
1. Estatuko Administrazio Orokorrak eta Nafarroako Foru Komunitateak elkarri aitortzen dizkiote Mendekotasun egoeran dauden pertsonen autonomia sustatzeko eta laguntza emateko abenduaren 14ko 39/2006 Legearen inguruan dituzten eskumenak.
2. Espainiako Gobernuak konpromisoa hartzen du Mendekotasun egoeran dauden pertsonen autonomia sustatzeko eta laguntza emateko abenduaren 14ko 39/2006 Legea Nafarroako Foru Komunitatean foru araubideari jarraituz betetzeko, lege horretako bigarren xedapen gehigarriak aitortzen duen bezala, Konstituzioko lehen xedapen gehigarrian eta Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoan xedatzen den moduan.
Horrekin bat, 39/2006 Legea irizpide hauei jarraituz beteko da Nafarroako Foru Komunitatean:
a) Estatuko Administrazio Orokorrak eta Nafarroako Foru Komunitateak hitzarmen bat izenpetzen ahalko du39/2006 Legea Nafarroako Foru Komunitatean betetzeko modua zehazteko, bertan ezartzen diren printzipioak eta Nafarroako egoera soziala kontuan hartuz eta Nafarroako foru araubidea errespetatuz.
b) Foru Komunitateak Estatuari pagatzen dion diru-ekarpena gutxituko du, Estatuko arautegiak bermatu eta zehazten duen gutxieneko mailari dagokiona adina, Komunitatean bizi den onuradun bakoitzeko, haren mendekotasun gradu eta mailaren arabera. Halaber, Estatuko Administrazio Orokorraren eta autonomia erkidegoen arteko lankidetza esparruan adosturiko mailaren aplikazioaren ondoriozko kostua finantzatzeko Estatuko Administrazio Orokorrak erabiliko dituen aurrekontuetan parte hartuko du Foru Komunitateak, 39/2006 Legeko 10. artikuluan xedatzen denaren arabera, Estatuari pagatzen dion diru-ekarpenari gutxituz, ekitaldi bakoitzean indarra duen inputazio indizea Estatu osorako aurrekontu horiei aplikatzearen ondoriozko zenbatekoa.
c) Nafarroako Foru Komunitateko berezko finantzaketa urte bakoitzerako gutxienez ere Estatuko Administrazio Orokorrekoaren adinakoa izanen da, aurreko atalean xedatzen denaren arabera.
3. Nafarroako Gobernuak behar diren izapideak eginen ditu Mendekotasun egoeran dauden pertsonen autonomia sustatzeko eta laguntza emateko abenduaren 14ko 39/2006 Legeko agindu batzuen kontra aurkezturiko 2250/2007 konstituziokontrakotasuneko errekurtsoa Konstituzio Auzitegian bertan behera geldi dadin.
4. Erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
