navarra.es
Castellano | Euskara | Français | English
Ezagutzera eman
339/2010 Foru Agindua, azaroaren 8koa, Familia, Gazteria, Kirol eta Gizarte Gaietako kontseilariak emana, Desgaitasuna duten Pertsonei Arreta Emateko Plan Integrala onesten duena 2010etik eta 2013ra bitarteko urteetarako
(2010eko 154. NAOn argitaratua, abenduaren 20an)
Nafarroako Gobernuari eta Lehendakariari buruzko abenduaren 3ko 14/2004 Foru Legeak, 7.1 artikuluan, Nafarroako Foru Komunitateko politika orokorra zehaztu eta ezartzeko ahalmena ematen dio Nafarroako Gobernuari.
Bestalde, Gizarte Zerbitzuei buruzko abenduaren 14ko 15/2006 Foru Legeak ezartzen du plangintza orokorra Nafarroako Foru Komunitateko Administrazioari dagokiola, Nafarroako gizarte zerbitzuen plan estrategikoak eta plan sektorial orokorrak prestatuz. 27. artikuluan adierazten da plan sektorial orokorretan Gizarte Zerbitzuen Plan Estrategikoaren aurreikuspenak garatuko direla gizarte egoera jakin batzuetan, biztanleriaren ikuspegi sektorialetik abiatuta.
Aipatu foru legearen II. tituluan plangintzari buruz ezarritakoari jarraikiz, Familia, Gazteria, Kirol eta Gizarte Gaietako Departamentuak, Gizarte Gaien eta Garapenerako Lankidetzaren Zuzendaritza Nagusiaren bitartez, Desgaitasuna duten Pertsonei Arreta Emateko Plan Integrala prestatu du 2010-2013 urteetarako.
Planak bi zati ditu: lehenbizikoan, desgaitasuna duten pertsonen ezaugarri orokorrak eta beharrak aipatzen dira: non bizi diren, nolako desgaitasuna duten, haien diru eta osasun beharrak, egiten dituzten jarduerak, eguneroko eginkizunetan nola moldatzen diren, haien beharrak eta behar dituzten laguntzak, etab.
Bigarrenean, berez plana dena azaltzen da. Planak desgaitasuna duten pertsonei arreta emateko eredua lantzen du eta eremu horretako lana zuzendu behar duten gidalerroak jasotzen ditu. Era berean, plan berri hau aplikatuz lortu nahi diren helburu orokorrak ezartzen ditu.
Planaren prestaketa lanetan erakunde eta elkarteetako eta lanbide elkargoetako ordezkariek eta Foru Komunitateko beste eragile eta erakunde batzuek parte hartu dute, parte-hartze publikoaren prozesu baten bidez. Parte hartzeko prozesu horretan 209 ekarpen egin ziren, eta horren ondorioz, beste testu bat idatzi behar izan zen, ekarpen haietatik 131 jaso zituena.
Desgaitasuna duten Pertsonei Arreta Emateko Plan Integralaren proiektua bukatuta, Nafarroako Gobernuak, 2010eko urriaren 25ean egindako bilkuran hartutako Erabakiaren bidez, planaren jakitun dela adierazi zuen. Horren ondotik, plana onestea Familia, Gazteria, Kirol eta Gizarte Gaietako Departamentuari dagokio.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen bidez eta Familia, Gazteria, Kirol eta Gizarte Gaietako Departamentuaren egitura organikoa ezartzen duen irailaren 3ko 125/2007 Foru Dekretuaren bidez esleitu dizkidaten ahalmenak erabiliz, agindu dut:
Lehena
Desgaitasuna duten Pertsonei Arreta Emateko 2010etik 2013ra bitarteko urteetarako Plan Integrala onestea. Foru agindu honen eranskinean ageri da.
Bigarrena
Foru agindu hau eta Desgaitasuna duten Pertsonei Arreta Emateko 2010etik 2013ra bitarteko urteetarako Plan Integrala Gizarte Gaien eta Garapenerako Lankidetzaren Zuzendaritza Nagusira eta Familia, Gazteria, Kirol eta Gizarte Gaietako Departamentuaren Idazkaritza Tekniko Nagusira igortzea, behar diren ondorioak izan ditzaten.
Hirugarrena
Foru agindu hau eta Desgaitasuna duten Pertsonei Arreta Emateko 2010etik 2013ra bitarteko urteetarako Plan Integrala Nafarroako Parlamentura igortzea, Erakundeekiko Harremanetarako eta Gobernuaren Eledunaren Departamentuaren bitartez, foru erakunde horrek planaren berri izan dezan.
Laugarrena
Foru agindu hau Nafarroako Aldizkari Ofizialean argitaratzea, eta Desgaitasuna duten Pertsonei Arreta Emateko 2010etik 2013ra bitarteko urteetarako Plan Integrala Nafarroako Gobernuko Familia, Gazteria, Kirol eta Gizarte Gaietako Departamentuaren web orrian (www.cfnavarra.es/asuntossociales), behar diren ondorioak izan ditzaten.
